Magasins du groupe Casino en Corse : priorité à la vente sans découpe, une réponse sous quinze jours envisagée
Mentri ch’iddu hè statu validatu à liveddu naziunali un pianu suciali cù à u minimu 1 300 partenzi, Philippe Palazzi, u dirittori ginirali di u gruppu Casino hè andatu à u riscontru di u STC, di a CGT è di Force Ouvrière di i Geant Casino è di i supermarcati Casino di Corsica.
Issi sindicata sò stati visti unu ad unu.
Ùn hè ancu chjaru l’avvena di i 19 magazena è grussisti alimintarii di u gruppu CODIM2, ancu s’idda curri a voci chì metti l’ufferta di Charles Capia, liatu à Système U, in pusizioni favurevuli par ripiddà li.
Philippe Palazzi si hè cuntintatu d’una dichjarazioni bedda curta, dindu ch’iddu u piddaia in contu parsunalmenti u cartulari, è ch’iddu daghjia u favori à una vendita intreva di u gruppu CODIM.
Steti à senta à Philippe Palazzi.
U STC, par contu soiu, dici ch’iddu si ni stà sempri in a incirtezza, dillusu à pena d’ùn sapè ni di più di l’idintità di qual’ripiddaria u gruppu.
Eppuri, dici u STC chì Philippe Palazzi avaria suttintesu chì i niguziati sclusivi cù unu di quiddi chì pudariani ripiddà u gruppu, si pudariani fà da quì à quindici ghjorna.
Steti à senta à Eric Lunardi, à nomu di u STC di CODIM 2.
Issendu à penu menu pricisa, a CGT si hè fatta più pusitiva chè u STC.
Senza dà altri pricisioni, u sindicatu si hè dittu à pena tranquillizatu da a discussioni cù Philippe Palazzi.
Steti à senta à Patricia Grimigni, à nomu di a CGT CODIM 2.
