Affaire du drapeau corse : Jean-Louis Leca (SC Bastia) suspendu par la LFP
(A redazzioni d'Alta Frequenza) - A Cumissioni di disciplina di a Liga di Ballò Prufiziunali hà asaminatu ssu ghjovi u cartulari di l’incidenti accaduti dopu à u scontru di Liga 1 trà l’OGC Nizza è u SC Bastia u 18 d’uttrovi scorsu. Ramintemi chì u tarrenu di l’Allianz Riviera era statu invaditu dopu chì u guardianu rimpiazzanti bastiacciu Jean Louis Leca avissi fattu svintulà una bandera corsa. Dopu à què, ghjucadori di u Sporting sò stati minati annant’à u tarrenu da sustenidori è una parsona di a securità nizzarda. Dipoi u 23 d’uttrovi scorsu, a tribuna pupulari di u stadiu di l’OGCN era suspesa di manera cunservatoria, dopu chì u cartulari sighi statu missu in struzzioni. S'è a cumissioni hà dicisu ssu ghjovi à sera di sarrà ssa tribuna pà dui partiti (una hè dighjà passata a sittimana scorsa) è d'urganizà un scontru senza publicu attimpatu pà Nizza, quissa quì hà sceltu dinò di suspenda à Jean Louis Leca pà dui partiti, frà i quali una attimpata. Un ghjudiziu chì stupiscia è assai dubbitosu, chì sottu intendi una "pruvucazioni" supposta di u guardianu rimpiazzanti bastiacciu, chì t'hà un rimprovaru solu : avè purtatu cù fiertà a bandera corsa annant'à u tarrenu nizzardu pà fistighjà a vittoria di a so squadra. Un affari chì, da u principiu, avia inghjinnatu riazzioni numarosi ind'i media ma in parechji altri settori di a sucità, in Corsica soprattuttu. Pudaria cuntinuà torna cù una forza più tremenda dopu à ss'evenimentu novu di ssu ghjovi...
Sur le même sujet
