Gaz : la lettre
(A redazzioni d'Alta Frequenza) - Hè solu una lettara, ma una lettara chì pesa ! In fatti, ind'una lettara di u 18 di marzu di u 2015, mandata à Paul Giacobbi, Ségolène Royal voli ramintà l'evuluzioni di u cartulari energeticu di a Corsica. A ministra di l'Eculugia, di u Sviluppu Durevuli è di l'Energia ramenta chì, ind'u quadru di u prughjettu di legi annant'à a transizioni energetica, a Cullittività di Corsica devi metta in ballu cù u Statu, nanzi à u 31 di dicembri di u 2015, una nova Prugrammazioni Pluriannuali di l'Energia. Ségolène Royal insista ancu annant'à u fattu ch'ella ferma assai attenti pà ciò chì tocca u rispettu di ssa data, è dumanda dunqua à i partinarii, a ramintemi u Statu è a CTC, di mettasi à travaghjà u più prestu pussibuli. Aghjusta ch'ellu ci vularia chì una prima virsioni di a PPE sighi aduttata nanzi à ss'istati. Annant'à u fondu di u cartulari, ùn c'hè nulla di novu pà daveru, è u schema chì si prisenta hè quissu quì : una struttura di gaz naturali sarà stallata à u meziornu di Bastia ; arricà u gaz cù un "pipe" à a cintrali di Lucciana, eppo cù un antru cunduttu à quilla di u Vaziu in Aiacciu.
Steti à senta à Christophe Mirmand, u prifettu di Corsica, chì ci prisenta l'evuluzioni di ssu cartulari impurtanti.
Sur le même sujet
