Adoption du plan Lingua 2020 : satisfaction pour Femu a Corsica
(A redazzioni d'Alta Frequenza) - L’assemblea di Corsica hà aduttatu tardi in a sirata di ghjovi u pianu di sviluppu di a lingua corsa, un cartulari chì avia inghjinnatu parechji cuntrarietà duranti a prisintazioni scorsa à l’esecutivu di Corsica. Ùn c’hè micca statu prublema stavolta, dimustrazioni chì u travaghju era statu appruntatu bè prima è in cumissioni di manera à integrà à u meghju i muzioni è i brami di i sfarenti gruppi di l’assemblea. Altru cartulari maiò di a mandatura scorsa, ssu pianu di sviluppu t’avarà mezi finanziarii impurtanti, più di 10 millioni d’auri è pruvarà in una quindecina d’annati à prumova una sucità bislingua pà daveru. I gruppi naziunalisti sò stati assai prisenti com’è sempri pà ssu cartulari, ciò ci spiega a cuntintezza di Saveriu Luciani dopu à un votu assai pusitivu, 30 voci à prò di u prughjettu.
Steti à senta à Saveriu Luciani, cunsighjeru tarrituriali Femu a Corsica.
