Collectivité unique : Paul Giacobbi répond aux élus communistes de l'assemblée de Corse
(A redazzioni d'Alta Frequenza) - I dui dipartimenti sarani fusiunati ind'a Cullittività Tarrituriali chì furmaria dunqua una cullittività unica, è què dopu dumani, vali à dì in u 2018 ? A dumanda, posta dipoi un pezzu oramai, volta in urghjenza nant'à a scena mediatica dopu a doppia visita ministiriali di a sittimana scorsa. In fatti, Bernard Cazeneuve hà dichjaratu chì un amendamentu rilativu à a criazioni di ssa cullittività unica in Corsica pudaria essa intruduttu ind'a discussioni assai più larga di a legi NOTRe, l'Urganisazioni Tarrituriali Nova di a Republica in dibattitu in ssu mumentu. Sicondu u ministru di l'Internu, vulè fà validà a criazioni di ssa cullittività nova cù un referendum rimandaria à parechji anni dopu a nascita di quissa quì. Par andà in furia, Bernard Cazeneuve hà dittu ch'ellu ci voli chì l'assemblea di Corsica dicissi nanzi à u 17 di farraghju s'ella voli o micca chì ss'amendamentu, mudificatu o micca sicondu i desiderii di ssa listessa assemblea di Corsica, sighi prisintatu davanti à l'assemblea naziunali. U gruppu Cumunisti è Front de Gauche ùn cambia mancu appena di parè pà ciò chì tocca ssa famosa cullittività unica è soprattuttu annant'à a sparizioni di u referendum pà pudecci ghjunghja. A risposta di Paul Giacobbi hè propiu chjara : ùn pensa micca chì a riunioni di l'assemblea di Corsica in urghjenza sighi pussibuli, nè mancu nicissaria pà pudè renda una dicisioni annant'à una pruposta di u guvernu chì hè dighjà in anda.
Steti à senta à Paul Giacobbi, u presidenti di l'Esecutivu di Corsica.
Sur le même sujet
