Conseil Départemental 2B : le groupe Inseme a quitté la séance par protestation
(A redazzioni d'Alta Frequenza) - U troppu stroppia ! U missaghju hè quillu di i trè eletti di u gruppu Inseme di u Cunsighju Dipartimintali di Corsica Suprana, Vanina le Bomin, José Gandolfi è Anne Avenoso, chì sò partuti da a seenza di u ghjornu prima ch'ella cumincessi. A raghjoni di ssa partenza si trova in a dumanda fatta duranti l'ultima seenza à u presidenti di u Cunsighju Dipartimintali, François Orlandi, par uttena i pezzi ghjuridichi ch'ellu t'hà in u quadru di l'affari dittu "des gîtes ruraux" induva Paul Giacobbi, u presidenti di u Cunsighju Generali à l'epica di i fatti, hè statu missu in asamini. Ssa dumanda hè firmata senza risposta, ciò chì annarba propiu u gruppu Inseme. Gruppu chì ùn s'hè micca fattu prigà pà metta in avanti l'articulu di u Canard Enchaîné di ssu marcuri, chì annunzia l'asamini ssu ghjovi da u scagnu di u Senatu di a fini di l'immunità parlementaria di u senatori di Corsica Suprana Joseph Castelli. Quillu chì hè statu u presidenti di u cunsighju generali da u 2010 à u 2014, hè suspittatu d'avè fattu travaghji in a so residenza principali cù soldi publichi. Un'illustrazioni sicondu Inseme di a prisenza di un sistema.
Steti à senta à Vanina le Bomin, a presidenti di u gruppu Inseme.
