Football (Ligue 1) - Le GFC Ajaccio remporte le derby face au SC Bastia (3-2)
(A redazzioni d'Alta Frequenza) - Ssa staghjoni in Liga 1, a suprana di i derbies sarà stata aiaccina, dopu a vittoria 3-2 di u GFC Aiacciu contr'à u SC Bastia ssa dumenica dopu meziornu in Mezzavia. Eppuru, sò i bastiacci chì ani scrittu a prima rialisazioni à a 9ima, N'Gando, prisenti nant'à u latu pà ripighjà un centru à rasu di tarra, fendu entra u ballò in a gabbia di Maury. Ma sò bè i rossi è turchini chì erani i più periculosi, è à a 20ima, a so voglia duvia essa ricumpensata quandu Boutaib, fora di a zona di u guardianu, hà fattu un bellu tiru à rasu di tarra pà batta à Leca. Contr'à bastiacci micca pricisi è senza riazzioni, u GFCA scrivia una rialisazioni nova un quartu d'ora dopu cù un tiru aereu di Pujol. Dopu a pausa, u scartu di qualità è di voglia criscia, postu chì l'aiaccini sapiani chì ssa vittoria l'aiutaria assai pà u mantenimentu mentri chì i bastiacci, com'è dipoi dui partiti, pariani ch'elli fussini in altrò, è micca abbastanza impegnati. È à rombu di luttà, à a 63ima, u Gazélec s'hè buscatu un penalty dopu à una falta di Cahuzac nant'à Boutaib, un penalty trasfurmatu da Larbi. S'è à a 76ima, u Sporting, riducia u scartu grazia à una rialisazioni di Cahuzac bè aiutatu da un sgaghjamentu mancatu da Mangane, u Gaz cuntinuava eppuru à duminà è s'hè buscu infini un successu meritatu in un derby cù abbastanza cunvivialità. Ssu successu hè impurtantissimu pà u GFCA chì esci da a zona rossa à trè ghjurnati di a fini, cù un 17imu postu, 37 punti è un'unità di più di pettu à Reims, u novu 18imu, mentri chì u Sporting fala à u 13imu postu è compii soca a so staghjoni avendu lintatu cù partiti mancu appena famosi.
