Football (Ligue 1) - Le SC Bastia rechute à Angers (1-0)
(A redazzioni d'Alta Frequenza) - Pà a novesima ghjurnata di Liga 1, u SC Bastia hà persu torna 1-0 in Angers. Duranti u prima tempu, u Sporting hà subitu assai, lachendu libari l'uffesi lucali. È ancu s'è Jean Louis Leca hà arristatu parechji ballò di una manera spittacularia, l'affari s'hè scioltu à a 41ima minuta, Ketkeophomphone ripighjendu un tiru chì era statu eppuru surtitu propiubè da Leca. Dui minuti dopu, u guardianu bastiacciu hà arristatu d'altrondi un penalty di Camara dopu à una falta di Mostefa annant'à Ketkeophomphone. Dopu à a pausa, a squadra bastiaccia hè firmata listessa, cù micca abbastanza scimità à u nivellu uffensivu è senza ispirazioni. In fin di partita, apprufittendu di a fatiga di i lucali è di cambiamenti tattichi piuttostu purtati annant'à a vitezza è u contru, u Sporting hà pruvatu à andà di più versu i gabbii d'Angers, ma in vanu. Cù deci punti, i bastiacci sò quatordicesimi cù sempri sei punti di più di pettu à a zona rossa.
