Football (Ligue 2) - Derby ACA-GFCA : la réaction de Thierry Laurey
(A redazzioni d'Alta Frequenza) - U GFC Aiacciu hà avutu a so rivincita ssu vennari à sera in Timizzolu pà u sicondu attu di u derby contr'à l'ACA in Liga 2. I ghjucadori di Thierry Laurey ani vintu largamenti 3-0. Dopu à un primu quartu d'ora piuttostu Biancu è Rossu, i Rossi è Turchini ani scrittu una prima reta grazia à a so prima uccasioni vera cù Poggi à a 23ima minuta. Contr'à ghjucadori d'Olivier Pantaloni di un nivellu assai bassu in tarmini di ghjocu è di mintalità, u GFCA hà duppiatu l'affari in principiu di sicondu tempu à a 55ima grazia à Pujol prima di cuncluda à calchì minuta di a fini cù Mayi, appena dopu à a so intrata nant'à u tarrenu. Una sirata nera pà l'ACA chì hà compiu a so partita à deci dopu à a ferita d'Abergel è trè cambiamenti dighjà fatti. Dopu à 21 ghjurnati di campiunatu, i ghjucadori di Thierry Laurey sò terzi cù 36 punti, mentri chì quilli di u presidenti Orsoni falani à u 14imu postu è t'ani 24 unità. Cù ssu successu, u Gaz cuntinueghja a so billissima strada, ciò chì ùn impidisci micca à Thierry Laurey, malgradu a cuntintezza, di firmà assai prudenti pà ciò chì tocca à l'avvena.
Steti à senta à Thierry Laurey, l'intrenori di u GFCA.
Sur le même sujet
