Football (National) - Un CA Bastia en reconstruction a repris l'entraînement
(A redazzioni d'Alta Frequenza) - Cinqui ghjucadori. Ssu sciffru hè quillu di u numaru di ghjucadori chì ani dicisu di cuntinuà l'aventura cù u CA Bastia pà ssa nova staghjoni di Naziunali. Pà u CAB, chì duvaria essa ubligatu di ghjucà in Armand Cesari, hè ghjunta l'ora di a ricustruzzioni. Di fattu, sò quatordeci ghjucadori eppo dui altri pruvati chì ani fattu a ripresa ssu luni, cù facci novi in più, com'è Mathieu Pichot, anzianu di u Poiré sur Vie chì sarà u guardianu di u CAB quist'annu, Azzedine Azzioui, mezu di tarrenu di 20 anni libaru dopu a fini di u so parcorsu cù u SC Bastia, Sébastien Flochon, mezu di tarrenu dinò ellu chì ghjunghji da u Havre, o ancu Giovan Vairelles, attaccanti chì era annu inde l'Union Luxembourg. Prufili chì sarani raghjunti da quì à pocu da Luka Kikabidze, mezu chì duvaria essa impristatu in furia da u SC Bastia, è calchì altri ghjucadori pà ghjunghja à un effettivu di vintidui elementi. È cù ssa ricustruzzioni, hè propiu difficiuli pà l'intrenori di u CAB, Christian Bracconi, di dà scopi pricisi.
U stemi à senta.
