Inscription de la Corse dans la Constitution : Jean-Martin Mondoloni défend le pouvoir d'adapter la loi, non pas de légiférer
(A redazzioni d'Alta Frequenza) - "Ùn si pò micca metta suchju di 74 inde una buttiglietta di 72-5" ! Eccu u parè di u gruppu Per l'Avvene di l'Assemblea di Corsica, purtatu da Jean Martin Mondoloni, cuncirnendu a pruposta d'articulu di u presidenti di l'Esecutivu, Gilles Simeoni, pà u prughjettu di scrizzioni di a Corsica inde a Custituzioni. U gruppu di diritta dinunzia "un'impustura", ambiguità, cù una maghjurità tarrituriali in "diliriu istituziunali". Per l'Avvene, chì ùn vutarà micca u testu prisintatu da Gilles Simeoni, hà da prupona a so redazzioni d'articulu stessa, quì dinò cù u numaru 72-5, chì si voli "ardita, rialista" è senza, d'appressu à ellu, "idei dummatichi piattati cù a vulintà d'alluntanassi" ; una pruposta soprattuttu "senza cambiamentu custituziunali", incalcani l'eletti di l'uppusizioni è induv'ella ùn hè mai scritta a parolla "autunumia". S'è i naziunalisti volini uttena oghji u puteri di fà a legi, u gruppu di diritta dumanda pà contu u soiu u dirittu d'adattà a legi à i specificità di a Corsica, è voli metta in avanti ssa diffarenza, cunvintu chì tutti i pussibilità ufferti oghji da i cumpitenzi attuali di a Cullittività di Corsica ùn sò ancu sfruttati inde parechji duminii. In più di què, Per l'Avvene dinunzia, di pettu à a prisenza à più pudè di ssu sughjettu inde u dibattitu puliticu, una Cullittività di Corsica "in panna", è metti in risaltu a nicissità di metta in opara tutti i puteri è i missioni di ssa stituzioni nascitoghja.
Steti à senta à Jean Martin Mondoloni.
