L'AC Ajaccio dénonce des propos anti-corses émanant des joueurs d'Auxerre
(A redazzioni d'Alta Frequenza) - In un cumunicatu di stampa publicatu nant'à u situ internet di u club, l'AC Aiacciu faci sapè a so scuntintezza putenti di pettu à u "razzisimu contr'à i corsi" di parechji ghjucadori U19 di l'AJ Auxerre. Nanzi à l'ottesimi di finali di a cuppa Gambardella (l'equivalenti di a cuppa di Francia U19), urganizati ssa dumenica dopu meziornu, certi ghjucadori visitori si sariani lacati andà à parullacci contr'à i Corsi. In riazzioni, u scontru s'hè passatu cù un ambienti particulari. Duranti ssa partita, l'aiaccini ani datu a più bella risposta, cù una vittoria è una qualificazioni pà u ghjiru chì veni. Eccu quì sottu u cumunicatu di l'AC Aiacciu.
"A partita di Cuppa Gambardella s'hè passata in un cuntestu appena particulari, disturbata da l'interferenzi di i reti suciali induva a bistialità a più primaria hè, oghji ghjornu, spartuta in furia. Nanzi u scontru, Waly Diouf, ghjucadori di l'AJ Auxerre, hà pinsatu ch'ella era una bona di fà cumenti contr'à a Corsica è i Corsi... Com'è a pudeti senta à a fini di ssa videò. Un antru ghjucadori di l'AJA hè statu putenti inde l'offesa nant'à a reta suciali di videò in diretta. L'AC Aiacciu hè scandalizatu di pettu à u cumpurtamentu è a mintalità di ssi ghjucadori. U razzisimu contr'à i corsi diventa un razzisimu urdinariu in u mondu di u ballò è ùn hè mai cundannatu. In particulari in u duminiu amatori induva i nostri squadri di ghjovani sò insultati di una manera rigulari nant'à a so insularità è i so urighjini. Oghji, i nostri ghjovani Corsi ani datu a più bella risposta nant'à u tarrenu qualifichendusi pà a prima volta di a storia di u club in quarti di finali di a Cuppa Gambardella.
Da un'antra banda, l'AJ Auxerre, cù u so presidenti, hà prisintatu scusi à u club è cundannarà di una manera disciplinaria quilli chì ùn ani micca avutu un cumpurtamentu degnu.
Sur le même sujet
