L'importance des fêtes de Pâques en Corse
(A redazzioni d'Alta Frequenza) - Hè oghji u vennarì Santu, ghjornu impurtantissimu di a Sittimana santa pà tutti i Cristiani di Corsica. Messi è prucissiò sarani celebrati inde l’isula sana pà l’uccasioni. Ma a prucissioni a più famosa ferma di sicuru quilla di u Catenacciu, chì si farà stasera à partasi di 9 ori-9 ori è mezu in Sartè. U penitenti, tuttu di rossu vistutu, trascinarà a so croci di 34 chilò è a so catena pisiva ind'i carrughji di a cità. Cascarà, com'è Cristu è com'è a voli a tradizioni, trè volti nant'à a so strada. Un avenimentu rilighjosu di trinca chì adunisciarà torna una volta millai di fideli di Corsica ma dinò d’altrò. Una festa di Pasqua chì t'hà un'impurtanza assai particulari annant'à l'isula, locu di storia testimoniu di un attaccamentu seculari à a manifestazioni di una fedi sincera. L'uccasioni di mandà un missaghju di paci è di sulidarità, par asempiu di pettu à a situazioni fatta à i Cristiani d'Urienti, turmentati.
Steti à senta à Ghjuvan Ghjacumu Andreani, chì raprisenta a cunfraterna San Ghjuvan Battista in Aiacciu.
Sur le même sujet
