La LDH de Corse et Ghjuventù Tocca à Noi vent debout contre l'antiterrorisme
(A redazzioni d'Alta Frequenza) - « A ghjustizia contr’à u tarrurisimu và contr’à l’appaciata ! » A Liga di i Diritti di l’Omi è Ghjuventù Tocca à Noi ani mandatu ssu missaghju più cà chjaru duranti una cunfarenza di stampa cumuna sabbatu in Aiacciu. I dui associ aviani dicisu di parlà di una sola voci di l’arristazioni di militanti naziunalisti di ss’ultimi mesi o ancu di i « periculi di l’antitarrurisimu ». D’appressu à elli, ùn hè micca una ghjustizia « nurmali », « sirena », hè ancu par elli un « anacrunisimu » di pettu à u prucedimentu di paci ingaghjatu in Corsica dipoi l’annu scorsu è l’annunziu di u FLNC di piantà a lotta armata. Sempri ind’a ricerca di rinfurzà u prucedimentu d’appaciata trà l’isula è u Statu, u prublema di l’avvicinamentu di i prighjuneri pulitichi è quillu di l’amnistia fermani fundali. S’è oghji, ss’ultima dumanda in particulari faci guasgi l’unanimità ind’a raprisintazioni pulitica isulana, tocca oramai à u guvernu di pricisà a so pusizioni pà pudè veda spuntà a luci di a spiranza è un avvena più bellu, d’appressu à Elsa Renaut.
Steti à senta a presidenti di a LDH in Corsica.
