Langue corse et convention Etat-CTC : du bon, mais peut mieux faire, selon Jean-Guy Talamoni
(A redazzioni d'Alta Frequenza) - Signatura ssu marcuri in u Grand Hôtel di a cunvenzioni Statu-CTC 2016-2021 nant'à u pianu di sviluppu di l'insignamentu di a lingua corsa. Si prisenta in dui assi maiò : a generalisazioni prugressiva di l'insignamentu bislinguu da a scola materna è l'integrazioni di a lingua è di a cultura corsa à tutti i nivelli d'insignamentu è di furmazioni. Un pianu di 17 millioni d'auri nant'à cinqui anni, finanziatu à parità da u Statu è a Cullittività tarrituriali di Corsica. L'innuvazioni maiò di ssa cunvenzioni hè l'elaburazioni è a missa in ballu di un pianu eccezziunali di furmazioni di 700 insignanti, vali à dì a mità nant'à l'isula, à partasi di a riintrata 2016, in u prima gradu. U presidenti di l'Assemblea di Corsica Ghjuvan Guidu Talamoni accogli di manera abbastanza pusitiva a signatura di ssa cunvenzioni. Malgradu tuttu, da un puntu di vista propiu puliticu, ferma solu un affari chì ùn pudarà micca guarantiscia di salvà a lingua corsa. Senza cuufficialità, salvezza ùn ci ni sarà : si pò riassuma cusì u parè di u presidenti di l'Assemblea di Corsica.
Steti à senta à Ghjuvan Guidu Talamoni.
Sur le même sujet
