Le conseil général de Haute-Corse sceptique face à la réforme territoriale
(A redazzioni d'Alta Frequenza) - C'era ssu ghjovi l'ultima sissioni di l'annu di u cunsighju generali di Corsica Suprana, è duranti quissa quì hè statu vutatu, com'è sempri, u bughjettu pà l'annu chì veni, cù 21 voti à prò è 6 eletti chì ùn ani micca datu u so parè. Ma s'è di regula, ssu cartulari hè u puntu maiò di una sissioni simuli, quissu quì hè statu piattu da dui altri cosi. A prima, l'assenza di Joseph Castelli, u presidenti di u cunsighju generali chì t'hà prublemi gravi di saluta. Malgradu tuttu, ùn hè ancu à prisintà qualsiasi demissioni, ancu s'è a so successioni s'appronta dighjà daretu à a scena induva Paul Giacobbi, chì t'hà sempri un'influenza assai impurtanti inde un emiciculu induv'ellu hè statu prisenti un tempu longu, avaria sceltu François Orlandi, cunsighjeru generali di Capu Bancu, pà pighjà a seguita di Joseph Castelli s'ellu duvia demissiunà da quì à l'alizzioni di marzu. U sicondu affari chì hà piattatu u bughjettu primitivu era una muzioni aduttata da u cunsighju generali pà fà cunnoscia cù forza u so disaccordu di pettu à a riforma istituziunali aduttata a sittimana scorsa. In fatti, u cunsighju generali, chì temi di veda un'istituzioni di un nivellu bassu pà Bastia, voli chì i membri di a futura Camara di i Tarritorii sighini eletti à u suffraghju universali è micca scelti da i futuri eletti tarrituriali.
Steti à senta à Jacky Padovani, vici presidenti di u cunsighju generali di Corsica Suprana, chì rimpiazzava u presidenti Castelli.
Sur le même sujet
