Le dossier SNCM s'invite dans la campagne des élections européennes
(A redazzioni d'Alta Frequenza) - Sarà torna una nova ghjurnata impurtanti luni duranti a riunioni di u cunsighju di survighjenza di a SNCM. Si sà chì l'investidori nurvegianu SIEM, chì pudaria cumprà battelli novi pà a SNCM, sarà oghji à u ministeru di i trasporti pà fà valè i so pruposti, ma dinò i so esigenzi. Si sà dinò chì Didier Quentin, diputatu UMP rapurtadori di a cumissioni di l'affari aurupei di l'Assemblea naziunali hà fattu una pruposta pricisa pà ciò chì tocca u prublema trà a SNCM è a Cumissioni Aurupea. Dumanda tuttu simpliciamenti chì a SNCM rimbursessi i 440 millioni d'auri dumandati da a Cumissioni Aurupea è chì u Statu indennizessi l'azziunarii privati chì pà contu soiu lacariani corra l'azzioni ghjuridichi. A SNCM ricivaria da u so cantu un'indennisazioni pà cumpensà i soldi chì li sò chersi pà u serviziu cumplementariu, vali à dì 220 millioni d'auri, parchì di sicuru u serviziu hè statu rializatu duranti i sei anni vulsuti. Una pruposta ricusata oghji da Gérard Couturier è Marc Dufour chì ani mandatu una lettara à tutti i diputati. Par elli, ssa suluzioni, saria "un'appiecazioni dummatica" di i ghjudizii aurupei chì pudaria purtà a SNCM fin'è a so morti. L'evuluzioni di ssu cartulari pudaria crià spiccanzi veri duranti l'alizzioni aurupei, parchì tuttu ognunu dà oramai a so analisi annant'à u sughjettu. Vincent Peillon, par asempiu, chì era arimani in Corsica, hà ricusatu cù forza a pruposta di u diputatu Quentin. Eppuru, pà ciò chì tocca l'impegnu di u Statu, u diputatu aurupeu voli firmà assai prudenti, è par ellu ùn ci voli micca à fà i cosi à pezzi è à buccò, un affari chì inghjinnaria torna a collera di l'istanzi aurupei. Pà Vincent Peillon, ci voli à discorra inghjiru à una suluzioni d'avvena cù a Cumissioni Aurupea.
Stemulu à senta.
