Le ministère de l'Intérieur interdit le déplacement de supporters de l'AC Ajaccio à Furiani
(A redazzioni d'Alta Frequenza) - Dopu à un arrestu prifitturali, hè un arrestu ministiriali chì pruibisci "u spiazzamentu individuali o cullettivu, qualsiasi u mezu, di parsoni cunsidarendu si com'è sustenidori di l'AC Aiacciu o cumpurtendu si di ssa manera" trà a Corsica Suttana è a cumuna di Furiani ssa dumenica pà u derby trà u SC Bastia è l'AC Aiacciu. Ss'arrestu, presu ssu marcuri da u ministru di l'Internu Bernard Cazeneuve, hè ghjustificatu da l'incidenti accaduti duranti l'ultimi derbies è i scontri senza publicu in cuntinenti chì sò stati inghjinnati, ma dinò da l'incidenti chì ani uppostu unu di i dui clubs ad altri squadri di Lega 1. Hè ghjustificatu dinò da u "risicu riali è seriu di baruffi trà i sustenidori di i dui clubs", è u fattu "chì a mubilisazioni di i forzi di securità, ancu di manera assai impurtanti, ùn bastessi micca par assicurà a securità di i parsoni in parechji lochi di a cità, com'è par asempiu quilla di i sustenidori stessi duranti tuttu u traghjettu", l'arrestu prifitturali di u prifettu di Corsica Suprana ùn bastendu micca quì d'appressu à ciò chì hè dittu. U ministru di l'Internu cunsidareghja chì "solu l'interdizzioni di spiazzamentu individuali o cullettivu di i parsoni cunsidarendu si com'è sustenidori di l'AC Aiacciu o chì si cumportani di listessa manera pò parmetta di schisà tutti i risichi serii pà a securità di i parsoni è di i bè".
