Le parti Forza Nova reprend ses activités et désigne Christophe Canioni pour les municipales à Bastia
Dopu à un silenziu di guasgi dui anni, u partitu di strema dritta Forza Nova, chì avia fattu 0,6 % di i voti à l’alizzioni tarrituriali è 2,07 % à i municipali di u 2020 in Bastia, ripidda vita.
Direttu da Filippo de Carlo, hà fattu fusioni cù Avvene Corsu, a struttura di Christophe Canioni, anzianu cunsiglieri tarrituriali di u Front National trà u 2015 è u 2017.
Piddarà d’altrondi i cumandi di a lista Forza Nova pà i municipali di u 2026, in Bastia.
U partitu, chì si pusiziunighja à prò di i russii è da anti atlantista in u quadru di a guerra in Ucraina, parla di i crimini di l’OTAN è dici chì l’Unioni Aurupeana hè a serva di Washington.
Pà l’alizzioni aurupeani, ùn ni darà cunsigni di votu Forza Nova.
U partitu, chì vidi u so tarrenu ideulogicu accupatu da a nova Mossa Palatina, si voli staccà da issu muvimentu : puri issendu contru à a migrazioni, ùn hè d’accunsentu cù a viulenza di i parolli di Nicolas Battini.
Steti à senta à Filippo de Carlo.
Christophe Canioni sarà dunqua u capilista d’issu partitu à i municipali, sustinutu da altri strutturi di a dritta idintitaria, com’è Leia Naziunali.
Senza pricisà tantu u so prugrama, voli risponda à i brami dillusi di quiddi chì ani missu à Gilles Simeoni, po’ à Pierre Savelli, à u cumandu di a mirria di Bastia.
Christophe Canioni duvaria dunqua pittughjà si à Nicolas Battini, chì ùn la piatta a so vodda d’essa candidatu à i municipali llu 2026 in Bastia.
U candidatu Forza Nova dinuncia u discorsu carcu à odiu di Nicolas Battini, è temi ancu ch’iddu ùn lampi a Corsica in cori à cunflitti armati chì ùn duvariani essa i soi.
Steti à senta à Christophe Canioni.
