Ordonnances pour la collectivité unique : les explications du groupe Prima a Corsica

(A redazzioni d'Alta Frequenza) - 31 à prò, 20 contru ! Eccu u risultatu di u votu intarvinutu arisera versu 7 ori è chì hà dunqua dicisu di crià, pà u 1a di ghjinnaghju di u 2018, a Cullittività di Corsica. L’assemblea di Corsica duvia dà in fatti u so parè nant’à ssi famosi urdinanzi, trè in tuttu, pruposti da u guvernu dopu à una cuncertazioni longa cù a raprisintazioni pulitica di l’isula. A suppressioni di i dipartimenti ! Eccu u tarmini genericu cù chì s’hè fattu ssu dibattitu ; una furmulazioni chì i mesi passendu hà fattu crescia di più in più a tinsioni nentru à u dibattitu puliticu. Par via di u calendariu, ci voli à dì chì a strada scelta da u guvernu era stretta, vali à dì u dicretu di u guvernu inveci di a strada legislativa di l’Assemblea naziunali. Ramintemi chì ssi trè urdinanzi difiniscini u quadru istituziunali, eletturali è finanziariu di a cullittività di Corsica nova à partasi da u 1a di ghjinnaghju di u 2018. Si pò dì à l’accorta chì à partasi da tandu, ci sarà solu una cullittività di Corsica è i dui dipartimenti sarani trasferiti in una camara di i tarritorii cù un puteri solu cunsultativu. A maghjurità hà avutu una ghjurnata difficiuli arimani, ma infini c’era a suddisfazioni à a fini di a « longa strada » iniziata da Pierre Chaubon sei anni fà. A diritta chì, ramintemula, avia participatu à u votu « storicu » di i 42 in u 2014, hà cambiatu di parè ; hà ancu vutatu contr’à ss’urdinanzi pà raghjoni chì José Rossi hà spiegatu duranti un tempu longu. A diritta hà racoltu u sustegnu di u Front National, vali à dì in tuttu 15 voti. A situazioni hè più cumplessa à manca parchì, ùn hè micca una surpresa, i trè cumunisti ani vutatu contru. Paul Marie Bartoli, ùn hè mancu quì una surpresa, hà vutatu dinò contru, com’è Delphine Orsoni chì avia datu u so puteri à Antoine Ottavi chì hà vutatu à prò pà contu soiu. U gruppu di Paul Giacobbi hà dunqua sceltu di cuntinuà nant’à a via tracciata da Pierre Chaubon parechji anni fà.

Steti à senta à Maria Giudicelli.