Rassemblements de salariés de la SNCM hors structures syndicales
(A redazzioni d'Alta Frequenza) - Salariati di a SNCM, fora di qualsiasi struttura sindicali, hè impurtanti di pricisà lu, si sò aduniti ssu luni da mani, in Marseghja, Bastia ma dinò davanti a prifittura di Corsica in Aiacciu. Ss'ultimi, ricivuti appena dopu da u direttori di cabinetu di u prifettu, vuliani fà ricullà i so inchietudini di pettu à l'avvena di a sucità, par via, d'appressu à elli, di "l'azzioni à l'appiattu pà purtà la à a bancarotta". In fatti, i salariati dinunziani par asempiu "un ghjocu doppiu di u Statu è di u ministru di i Trasporti", chì urganizariani, sempri sicondu elli, "di manera discreta u fallimentu di a SNCM", dicendu à tempu ch'elli volini "salvà u ghjuvellu di u Mediterraniu". Ssi salariati fora di qualsiasi struttura sindicali, dicendu chì a so sucità pò campà, facini cunnoscia dinò u so timori pà ciò chì tocca ssa settimana ditarminanti pà a SNCM, cù una riunioni trà raprisintanti di u Statu è l'azziunarii pà ammintà u pianu di salvezza di a cumpagnia, è una nova sissioni di l'Assemblea di Corsica cù à u prugramma l'Ubligazioni di Serviziu Publicu Marittimu.
Steti à senta à Gilles Marcaggi, unu di ssi salariati di a SNCM.
