Transports maritimes et déchets : le nouvel exécutif de Corse au travail !
(A redazzioni d'Alta Frequenza) - Ultimu ghjornu di l'annata 2015 è prima cunfarenza di stampa di l'Esecutivu di Corsica sanu annant'à a gistioni attuali è assai calda di l'affari di a Corsica. Trasporti marittimi è rumenzuli, mai una mandatura ùn sarà principiata in una situazioni di un'urghjenza simuli è l'Esecutivu di Corsica ùn hà micca vulsutu perda tempu annant'à cartulari chì pudariani impeghjuriscia. U primu puntu hè custituitu di sicuru da u trattamentu di u prublema di i trasporti marittimi. À partasi di luni in fatti, principiarà una linea marittima nova trà a Corsica è u cuntinenti lanciata da u consortium Corsica Maritima. À partasi di marti, in riazzioni à què, i sindicati ani dicisu d'urganizà una greva pà fà cunnoscia a so scuntintezza contr'à ciò ch'elli cunsidareghjani com'è "una trava à u serviziu publicu". In più di què, u 29 di dicembri, a Méridionale hà ricusatu di signà u ducumentu cù a CTC, allora chì nulla ùn pudia priveda què, è senza spiegazioni seria. U Cunsighju Esecutivu hà datu l'ordini à a Meridiunali d'assicurà u serviziu, com'ellu a privedi l'articulu 43 di u cuntrattu di dilegazioni di serviziu publicu. L'altru cartulari caldu di sicuru, hè quillu di i rumenzuli, è quì torna a CTC hè in una situazioni difficiuli. D'un puntu di vista teoricu, si sà chì i ruminzulaghji aprarani torna u 1a di ghjinnaghju pà intarrà a quantità di rumenzuli chì l'hè stata attribuita. Si sà chì dapartuttu, ssi centri t'ani difficultà pà accoglia u soprapiù di rumenzuli inghjinnatu da ssi tempi di crisa. A Cullittività di Corsica chì, a ramintemi, ùn hà micca una cumpetenza diretta in u trattamentu di i rumenzuli, postu ch'ella tocca à u SYVADEC, hà dicisu di pighjà l'affari in manu. Hà da apra in furia, vali à dì da quì à calchì ghjornu, una cuncertazioni larga pà riveda tuttu u sistema di racolta è di trattamentu. Risultati impurtanti pudariani essa arrighjistrati in u tempu cortu trà trè è sei mesi.
Sur le même sujet
