Football (Ligue 1) - Un SC Bastia impérial s'impose à Nantes (2-0)
(A redazzioni d'Alta Frequenza) - Una vera lizzioni di ballò, eccu ciò ch'ellu hà datu un SC Bastia putenti è guasgi parfettu contr'à un FC Nantes bellu losciu 2-0. Annant'à u tarrenu di a Beaujoire, i bastiacci ani duminatu in furia a partita par ùn cappià più ssa duminazioni. Cù una creatività uffensiva assai impurtanti è intarissanti, i ghjucadori di Ghislain Printant ani affucatu i so avversarii, micca capaci d'andà di fronti di manera cuerenti è guasgi listessi di pettu à ciò ch'ellu era u Sporting nanzi à a ghjunta di u so intrenori attuali. Di sicuru, l'assalti ripituti è ispirati ani pagatu, cù un'azzioni magnifica lanciata da Palmieri, prulungata da Kamano è cuncretizata da Sio in un asempiu d'armunia di u cullittivu à a 30ima minuta. Dopu à a pausa, sempri cusì in forma, u Sporting cuntinuava à essa impressiunanti, una pristazioni torna più faciuli cù a sclusioni sivera d'Aristiguieta à a 64ima. È ondeci minuti dopu, dopu avè purtatu a so azzioni da a mità di u tarrenu contr'à lucali demubilizati, Ayité hà tiratu à l'intrata di a zona di u guardianu è battutu à Riou chì s'hè mancatu pà daveru. U Sporting hà cunfirmatu ch'ellu hè annant'à una dinamica assai pusitiva cù tredeci partiti senza perda qualsiasi a cumpetizioni, è s'è u scartu cù a zona rossa ferma di quattru punti, u Sporting passa da u quindecesimu à u tredecesimu postu è t'hà solu oramai dui punti di menu di pettu à u dicesimu.
Steti à senta à Ghislain Printant, l'intrenori bastiacciu.
Sur le même sujet
