Rixe de Furiani : la thèse de l'agression à sens unique balayée par le parquet, de la prison avec sursis requise contre les quatre prévenus

Luni, ci hè statu u prucessu pà l’azzuffu successu trà parichji ghjovani, di notti trà u cinqui è u sei di ghjinnaghju, à nantu à unu staziunamentu in Furiani.

In a sala, erani numarosi i sustegni à Raphaël L.V, unu di i missi in causa. Fora, uni pochi d’omini pulitichi di a strema dritta erani chivi, ancu iddi, à sustena lu : Nicolas Battini, Christophe Canioni, Filippo de Carlo è Jean-Antoine Giacomi.

Raphaël L.V era ghjudicatu à mutivu di viulenzi cù arma. Rayane E.A, Ibrahim D. è Ilies O. erani ghjudicati à mutivu di viulenzi in riunioni contru à Raphaël L.V. Tutti sò d’età 18 anni.
Via issu prucessu, si hè pussutu veda chì l’affari ùn era lisciu lisciu, com’iddu era statu spiicatu da certi : l’azzuffu hè successu chì s’erani datu appuntamentu i ghjovani, parvia d’una liti trà dui ghjuvanetti, parvia d’imbarruscati successi innanzi, è forsa ancu di pruvucazioni razzisti via i reti suciali.

Raphaël hà dittu mentri l’audienza chì Ibrahim t’avia un’arma bianca, è chì iddu ùn hà cacciatu a cultedda chè par scuraghjì à Ibrahim è à i dui altri incausati.
I trè altri parsoni missi in causa, inveci, è parichji tistimogni, ani dittu ch’iddu ùn era statu chè Raphaël à caccià una cultedda.

I virifichi di a midicina ligali ùn ani pussutu dà cunfirma ch’iddu era statu fertu cù un’arma bianca, Raphaël. Ma hè statu minatu, in tarra, da i trè altri, buschendu si dui cannuchjali à l’ochja, calchì mucatura è uni pochi di granficaturi.
U prucuratori lla ripublica di Bastia, fendu a critica di a mossa mediatica, hà dinunciatu un’accolta di 600 parsoni nata da a bucia è a falsa riputazioni di sgaiuffi fatta à i trè altri incausati, insiriti in a sucità.

Hà dittu Jean-Philippe Navarre chì issu prucessu era quiddu di « a vigliaccaria di trè parsoni chì minani un omu in tarra, ch’ùn hè mancu più piriculosu. Quiddu di a vigliaccaria di Raphaël, chì da a so lagnanza sinu à a ghjunta in tribunali conta bucii, cù i so dichjarazioni cambiarini, par piattà dui cosi : 

- U ritrovu à nantu à u staziunamentu, chì veni in parti da a so iniziativa.

- U fattu d’avè purtatu, for’di casa soia, un’arma di catiguria D, par caccià la, fà la veda è minaccià ni l’altri parsoni.

Pà iss’azzuffu beddu urdinariu in fin’di contu, u prucuratori hà dumandatu sei mesa di prighjunia attimpati contru à Raphaël, è quattru mesa attimpati contru à Rayane, Ibrahim è Ilies. A dicisioni duvaria essa data u 26 di frivaghju, à dui ori.

Tutti i partiti civili ani dumandatu ch’iddi sichini assolti i so clienti. Stella Canava, l’avucata di Raphaël, hà dittu chì i riquisizioni di u prucuratori erani fatti à sensu unicu.
Ricusa l’accusazioni di bucia fatta à u so clienti, è ancu quidda di razzismu.

Steti la à senta.

Valérie Vincenti, l’avucata d’Ibrahim, dici chì u prucessu hà missu in risaltu a bucia di Raphael, ma ancu a lighjittima difesa di u so clienti.

Steti la à senta.

Jean-Pierre Ribaut-Pasqualini, l’avucatu d’un di l’altri missi in causa, hà dinunciatu a infiarata puliticomediatica pà un affari chì, fatta fini, hè beddu urdinariu.

Steti lu à senta.